Antonu Marielli, natu in 1951 in Sartè, prufissori di stòria è di lingua corsa. Autori, cumpunitori è cantarinu di u gruppu Diana di l’Alba. Hà scrittu in 2015 E fole di Ziu Antonu è in 2017, I sturietti di Ziu Antonu, un dizziunariu di Buccate, scappate è detti è parolle scarse è stu pocu, un dizziunàriu temàticu di 1200 pàgine, in trè toma : u prima toma hè sciutu cinqui mesi fà.
Eiu ti miru, Callipisge,
Calda hè la to arcova
Certi carezzi ghjattini
Vularia cun tè pruvà
È lu to pettu ripienu
Mi sindaria à sfrisgià …
O dulcigna passiunella,
La mo cara tinnarona,
Eiu ti voddu fà cunnòscia
I sicreti di u sacconu
È sti ghjochi vennerei
Cun mè, forsa, tù, farei ?
O la mea frandulina,
La me labbra curallina
L’oncatura di i to reni
Mi fàcini infantimà
Li so suttili griscelli
Sò pannelli à sfascià …
O la me dolci caldana
Ti vurria cuccuvà
Lu to prufumu muscanti
M’invaghisci lu pensà
Lu to zùccaru carnatu
Ch’e vurria accarizzà …
Ti tengu com’è pocu acqua
Ti sussuru à chjuchjuchjù
U me cori colmu si fraza
Augureghju l’à tù par tù
La me bramata fraschetta
La me adorna giuvanetta…